اكلت ساندويتش شعري

اكلت سندوتش

ركبت البسكلت

وشفت واحدة ست

فقلت ليه سكت 

وكنت ناوية اقول

 ولكن راح يطول 

وعندي في السكات 

كلام لكن زهقت 

انا اصلا كنت هبقى شاعرة بس ابويا الله يرحمه قالي الشعر دا للناس الفاضية

عن دكتورة هبة رؤوف

الدكتورة هبة وغيرهم أنا شخصيا كنت شايفة انهم بينتقدوا أخطاء الإخوان الي كانت أحد أسباب الإنقلاب.. الي يقول كان هيحصل إنقلاب كدا كدا معاك حق.. لكن كان في أخطاء.. وهي كانت شايفة إن أي تجربة عشان تنجح لازم يبقى في حد بينتقد الغلط فيها.. ويصحصح المسؤلين.. من إختيار أعضاء الشورى.. للدستور.. لموظفين في الرئاسة.. وغيره وغيره.. الي كتير منهم مكنش عنده لا الخبرة.. ولا المضمون ولا الشكل.. هتقولي شكل ايه ؟! هقولك المظهر الخارجي.. اقرأ السيرة واتعلم يعني إيه الرسول عليه الصلاة والسلام يعد جبة معينة لاستقبال الملوك الكفرة.. يعني لما يختار سفير يختار سيدنا مصعب رضي الله عنه  سيد شباب مكة وقريش .

يبقى كان  لازم نحسن من يمثلوا مصر في هذة المؤسسات .

 هي لاعمرها وقفت ضد الإخوان ولا ضد الدكتور مرسي.. كانت بتنتقد الي شيفاه مودينا في سكة غلط..

 لما وقعت الفاس في الراس فضلت تسكت.. وتشوف وراها ايه.. 

هتقول ايه؟ الي يتقال اتقال خلاص ومحدش سمعه .

 فضلت عدم الكتابة على صفحتها.. لكن دا لا يعني انها توقفت عن دعم الحق.. وانتقاد الغلط.. بالأمس حين تعرض بعض الشباب للقمع ذهبت الى القسم الي اتوقفوا فيه بكل شجاعة ودافعت عنهم..حاجة ميعملهاش ناس كتير بيدعوا البطولة .

حيرة

كتير بيكون جواك خير وسلام داخلي مع نفسك والدنيا.. لحد ماتقابل في سكتك ناس كارهه نفسها ومتخاصمة مع ذاتها.. وهوايتها العكننة على غيرها..بيعكننوا على غيرهم وبعدها يمثلوا انهم

 منشرحي الصدر وعايشين في سلام ونجاح ..

طيب ماحنا عارفين انكم كارهين لانفسكم أولا.. عندكم كلاكيع.

شخصيا أعرف شخصيات كتير كانت البسمة مش بتفارق وشهم.. بعد اختلاطهم بناس جديدة بعد فترة.. تلاقي الأسى على وشهم.. أسى من إن جواهم خير اتقابل بصد أو بشر أو غباء.. استلزم منهم انهم بعد فترة يردوا عليه.. ماهو مش هيفضلوا طول عمرهم متسامحين !

غريب قوي الانسان الي يبقى كاره لنفسه ومعقدها.. وميحسش انه أدى مهمته الا لما ينكد على غيره.. أو يمارس عليه محاولات قهر بتفشل لأن الي قدامه حر..وبيرفض القهر.. لكن بيحزن انه مضطر يقابل الشخصيات دي.. وبيتصدم ان في ناس عقليتها كدا . 

جواها دكتاتور بشع مريض ومعقد .

ريحانة جباري

-  اليوم  السبت  محرم 1436 هجري

&25اكتوبر2014ميلادي  أُعدمت ريحانة جباري الإيرانية  ، وذلك لأنها قتلت ظابطا مخابراتياً دفاعاً عن شرفها      

رحمة الله وبركاته على الأحرار

وسلام على الأطهار في كل مكان..

موعدنا جنة علوية بإذن الله ، بعيدا عن انحطاط هذه الدنيا. 

مجرم

مجرم بشع هذا الذي يشعر بضعفك فيستغله أي استغلال.. حتى ولو بالتقرب منك..ومواستك "وليس من حقه"

علينا أن نحترم أحزان البشر ، ونصمت في جلال الألم ،

قد نبوح ببعض ما يحزننا ، من أجل البوح وفقط ، لا لنتسول ..

لا بأس ان ندعوا سراً لبعضنا البعض .

ياقدس انا قادمون

https://www.youtube.com/watch?v=Ui--I7I4fSo

لازم تتفرجوا على الفيديو دا ،وتوروه لاولادكم ،،،،متنسوش تفرجوه للعيال المهزوزة المنبطحة ،ولا اقولكم خسارة فيهم والله،،،البنت الصغيرة بتقوله مش عايزة عيش بشار لانه قاتل ويهودي، ومش هناكل الا لما كلنا ننتصر ،ونصبر وربنا احسن من الكل ،وانا باكل خبز عدس،،،،المذيع بيقولها بس المشايخ قالوا بشار كويس ولازم نعمل هدنة عشان نرجع ناكل ونعيش،قالتله دول مشايخ مجاذيب 

البنت غالبا متعدتش٦ سنين،،،المذيع بيقولها بشار دلوقتي شر،قالتله شر مش معقول 

اتفرجوا على الفيديو وفرجوا للي بتحبوهم 

جرعة امل ويقين،،بنت بطلة ،قوية، متهزتش وهي طفلة ،ولا قالت ليه كدا ،واحنا متنا وجعنا، البنت شيء جميل بجد ،صمود مخيف لكل الخونة،،البنت كلامها صفعني شخصياً مع اني كنت بفتكر نفسي قوية ،لكن انا مشوفتش عشر الي هي شافته،،

ياقدس انا قادمون 😊

ثورتنا ليه فشلت

عارفين.. الي ضيع مصر مش اهل الفساد القذرين الي ظاهر فسادهم.. دول اعداء ظاهرين .

الي ضيع مصر رموز مصر الي سكتوا وباعوا وادعوا الشرف وهم كتير.. رموز مصر الي نسيوا الشعب الي عايش في الترب.. وقعدوا ينظروا على الشعب في الإعلام .. ويعملوا ندوات

وناس في النص لا هما رموز ولا هما في الترب.. زيينا كدا.. قالوا احنا مالنا 

طالما في رموز.. الرموز دي هتحل مشاكلنا وتشوف امورنا

وناس عايشة في الترب بتشرب مجاري.. ومعندهاش مانع انها تفضل كدا لحد ماتموت !

 في اقذر من الاصناف الي فاتت بقى.. الي بيبيع نفسه للي يدفع اكتر.. ويفضلوا يشمشموا على الي بيدفع اكثر.. ويشتغلوا ليه مطبلاتيه وهتيفه .

 كوووووول دول معرفوش يحافظوا على مصر.. بقت مستنقع فساد ودعارة ودمار

 لما حب الشباب يثوروا عشان يطهروها وصرخوا حافظوا على مصر .

أنا حتى بدات اعذر الناس الي كفرت بالاخوان.. الاخوان اشتغلوا بوجوه  ذكرت الشعب بعهد الفساد..  كان لازم يجيبوا وجوه جديدة.. الشعب بعد الثورة كان جاب اخره خلاص.. واهل الفساد استغلوها فرصة😡

بعد ثورة كان لازم نشوف وجوه جديدة شابة كلها ثورة..الكبار اخطأوا التقدير جداً.. الشباب الي زي الفل سابوه يكتب على  مواقع التواصل وهما الي في الصدارة

وهما الناس كانت كفرت بيهم وبيعتبروهم جزء من نظام الفساد.. او رأوهم اعجز من مواجهة الفساد لماذا يبقى هيصطفوا وراهم ازاي ؟

بعد ثورة كان لازم يبقى مفيش خجل في محاربة الفساد.. بل قوة وشراسة في محاربة الفساد.. شراسة بمعنى الكلمة

لكن الكبار زي ما قالوا بلاش محاكمات ثورية.. عشان الاموال المهربة!

  بلاش شراسة في محاربة الفساد.. عشان 

مؤسسات الدولة هتقع !

 الحل حالياً مواصلة نضالنا  يانعيش احراراً.. يانموت بكرامتنا

مابعد الانقلاب

على فكرة فساد النظام لما بيحكم بيقدم نماذج فاسدة من كل التيارات ،،مع في كل التيارات محترمين افاضل 

حسن الشرقاوي يساري محترم لكن هو هيحاول يصبغة بصبغة اسلامية عشان يسهل حربه،،

النظام الفاسد  هيقدم من الاسلاميين حزب امن الدولة ، ويقدم من اليساريين منى مينا ويقدم من كل تيار ،من يضمن انهم متعاونون في فساده ،يسهل شراءها،،الاستاذ سيف الدين عبد الفتاح مثال  اخر،،ولو دورنا هنلاقي اسامي كتير ،لكن غالبا النظام بيحاول ابعادها وتشويهها

فساد النظام وزمرته ولو ادعوا انهم ضده وانهم ثورييون، يحاولون الصاق اي محترم بارز لمن يسعون لحربهم(الاصلاحيين)ليسهل سحقه مع التيار الاصلاحي

صراع حيزبونات الاعلام والنظام الفاسد مع اي محترم حتى لو مش محسوب على الاسلاميين ومحاولة الباسه ثوب الاسلاميين الاصلاحيين ،لان الاعلام بيحارب الاصلاحيين،،طريقة قمة في الخسة والمكر ،عشان زي ما بيقولوا يتاخد في الرجلين ،هما مش هيقدروا يحاربوه زي ما الاعلام بيحارب الاصلاحيين ،يبقى نقول انه منهم

في كل مجموعة او تيار او توجهه في مصر هنلاقي ناس محترمة ،ولم يبيعوا ذممهم ولم ينافقوا او يتملقوا

 وفي كل تيار وكل مجموعة هنلاقي الي اول ما يشوف سلطة جديدة يعرض نفسه للبيع ،ويقبل الايادي بطريقة سمجة ،واول ما يحس ان البساط بيتسحب يعمل ضدهم

 وما بين الناس الي بتشتغل شغل الخداميين منافقي القوة والسطلة، ومابين ناس ابطال بيحترموا ذواتهم ،هنلاقي ناس مهتزة زي المجند كدا(((:

 اجمل شيء في الانقلاب انه عرى النفوس تماماً،عرفنا مين خسيس الاصل ،ومين الجبان ومين البطل، ومين المهتز،،الانقلاب اجدع مصفى ،لو كنا قعدنا سنين عشان نكشف خبايا النفوس مكناش هنقدر بهذه البراعة

خالق الكون

قل واعمل الي شايفة صح ولا يهمك اي مخلوق زيك.. ربنا هو الي خلقه.. وربنا قادر مهما كان جبروته ومهما امهله ليظلمك احيانا.. انه ياخذه فلا يفلته.

الدنيا مش نهاية المطاف ولا باقية.

 

في دنيا ابدية ياريت تعمل ليها الآخرة..  ومتنتظرش اجر هنافي الدنيا.

والله لو ربنا في منتصف عملك في دار العمل نصرك واكرمك يبقى الحمد لله رب العالمين.. ادخر الاجر كله ليك في الاخرة يابقى فزت وربحت ونولت.

ليه ممكن أزعل لما اشوف انسان انا عارف انه مزور للحقيقة.. وكاذب.. او حتى مقصر في فهم الحق.. بيظلمني وربنا سايبه يظلمني.. هل الدنيا نهاية المطاف.

اهم شيء اننا عارفين ان ما اصابنا لم يكن ليخطئنا.. وما اخطأنا لم يكن ليصيبنا.. 

رفعت الاقلام وجفت الصحف.. وكتبت الاقدار.. فعش حراً او مت شهيداً.

مفيش مانع طبعاً وانت مضايق من ظلمهم وافتراهم انك ترفع ايدك للسما وتدعي عليهم.. يعجل لهم بالعذاب في الدنيا.. وينتقم منهم وينكل بهم.. ووقتها ابشر فان الله يقول لك: "وعزتي وجلالي لانصرنك ولو بعد حين" 

يابختك.. ياسلام.. بشر بيظلمك وربنا بيقسم بعزته وجلاله انه ينتقم ليك منه.. خليه بقى يظلمك على قد ما يقدر المغفل.

عن الثورة ومصر وثوراتها (كلام يعدل الدماغ )لمدون غير مشهور اسمه احمد سعيد

 الثوره هتوصل لمرحله الامان ويكون نصرها مضمون لما مبادئها تترسخ فى ادنى ذهن ادنى طبقات المجتمع ... وده عمره ماحصل فى مصر على الاطلاق

دايما مشاركه الطبقات الدنيا فى الثوره بتاتى تحت فهم مغلوط للثوره واستيعاب قشرى لمبادئها وطنطنه بمصطلحات محدش مؤمن فعليا بمعانيها

اما الطبقات الاعلى اللى ( المفروض ) عندها وعى اكبر , فهى بطبعها مش ثوريه انما اصلاحيه , بل هى ضد الفكر الثورى أصلا

والطبقات الاعلى دى بتتخذ من مصطلح الثوره مجرد قناع تخفى بيه اجراءات اصلاحيه هى عايزاها علشان تتجنب ثوره حقيقيه ممكن تحصل

فى ثوره 19 كان وقود الثوره الفلاحين واولاد البلد والمعلمين والفتوات , هما اللى عملوها , وركبها فى الاخر الافنديه

كان مشهد طبيعى تشوف باستمرار قهوجى ولا عربجى عمال يتكلم عن الاستقلال وابصر ايه , وهو فعليا مش فاهم ولا كلمه من اللى بيقول،،لذلك انتهى المشهد بالاتى , الاف الضحايا من البسطاء , ركوب الافنديه الاصلاحيين , صعود نخبجي قذر زى سعد زغلول , وفى صحتك يااحتلال

 نفس المشهد اتكرر بحذافيره بعد 98 سنه , حتى فى 19 ألهوا الثوار عن الفكره الاساسيه للثورة وهى الاستقلال الحقيقى وحطوا بدالها هدف مزيف وهو سعد

وفى 2011 بعد ما كان الهدف الحقيقى هو إسقاط النظام , تم استبداله بهدف مزيف وهو ابعاد ناعم لرأس السلطه متبوع بمحاكمه وهميه مضمونه البراءة، لذلك فأنا شخصيا لا اعتبر ما حدث فى 1919 ثوره , ولا ما حدث فى 2011 ثوره ... ما هى الا انتفاضات , ليس أكثر من ذلك

ولكن استثناء يناير ان اثارها ممتدة الى الآن , وارجح انها ستكون وقود لثوره حقيقيه ... ومن هنا تستمد انتفاضه 28 يناير تميزها، لأن الثورات العارمه الحقيقيه تقوم على انقاض انتفاضات فاشله بالاساس , لأن الثوره لابد ان تخرج من شعب فى حد ادنى من افراد عندهم الوعى الثورى

 وبما ان الثورات تقوم اصلا على انظمه واوضاع فاسده بلغت اقصى مداها , وبالتالى فى تلك الحاله تكون الشعوب فى منتهى الجهل وانعدام الوعى اصلا، لذلك يلزم احداث حراك فى المياه الراكده يتمثل فى تحرك اقل ( انتفاضه ) ستفشل بالتاكيد لانها لا تمتلك الحد الادنى من مقومات النجاح، الا ان مجرد الحراك البسيط ده فى حد ذاته ولو كان فاشل , فهو بمثابه صفعه او دش مياه بارده توقظ نسبه لا باس بها من الافراد، حجر صغير يتم القاؤه فى منتصف بحيره لتخرج منه موجات ودوائر تبدأ فى الاتساع التدريجى لتصل من مركز البحيره لاطرافها، راجعوا سيناريو الثوره الفرنسيه , السيناريو الحقيقى مش السيناريو السطحى اللى بيتعرض فى الافلام والمقالات، اقولكم حاجه احسن ؟ راجعوا السيناريو الايرانى لأنه أقرب .... راجعوه من أيام الانقلاب على مصدق إلى ما بعد الثوره الاسلاميه بسنوات ،للأسف , تأريخ ثورة 19 ضحل جدا , وفيه نقط كتير مطموسه فيه , عارفين ليه ؟ لأن تاريخ ثورة 19 كتبه الافنديه , مش الثوار ،سعد زغلول كان عليه شبه موافقه من الانجليز والقصر لتقديمه واهمال الزعمات الشعبية الحقيقية لذلك مع الأسف تبعات ثوره 19 ساهمت فى تطويل عمر الاحتلال فى مصر لمده تلاتين سنه ... عارفين ازاى ؟

بالشكل الآتى :

- ركبوا شخصيه وسخه عالثورة ( زغلول )

 استبدلوا الهدف الاساسى للثوره واللى هو مش متعلق باشخاص ( الاستقلال ) بهدف وهمى متمحور حول شخصيه الزعيم المزيف اللى هو سعد زغلول

 بدلا من ان كان هدف الجماهير هو ( الاستقلال التام ) اصبحت عوده زغلول من المنفى وتوليه الوزاره هى الهدف الاسمى للثوار

وتولى زغلول الوزاره , ونجحت الثوره على حد زعم ابنائها , وكانت اول قرارات زغلول هى قرارات قمعيه منها منع التجمعات D:

 وصنع الساسه الانجليز معادله سياسيه متقنه قائمه على صراع بين نخبه سياسيه لا تمثل سوى مصالحها ( الوفد ) وشرعيه رمزيه وهى ( الملك )

 واستمر الصراع ( عالنفوذ ) بين رمزين ( سعد وفؤاد ) وامتد ليصبح ( النحاس وفاروق ) وفى كل الاحوال خسر الطرفان واتوكس الشعب على طول الخط

وكان الرابح الوحيد فى تلك المعادله القذرة ( بريطانيا العظمى ) ،

 اذكر فيه سياسى انجليزى جه مصر اثناء ثورة 19 علشان يقيم حقيقه الثورة ومدى قوتها ونقاط ضعفها علشان بريطانيا تحط برنامج لاحتوائها باقل خسائر، السياسى ده كان معتقد ان ثورة 19 شبيهه بالثورة الايرلنديه فى 1916 فى راديكاليتها وعمقها , الا انه اتصدم من مشهد شافه بمجرد نزوله الشارع، الراجل ده نزل حى شعبى وعدى على قهوه سمع فيها اغنيه لمطرب قديم بيقول ( يامين يجيبلى حبيبى )،ساعتها الراجل قال الشعب ده مش بتاع ثورات ,  سلبى لدرجه انه عاوز يقعد مكانه وحد يجيبله حبيبه لحد عنده، وبدأت تتعامل بريطانيا مع الاحداث على انها زوبعه فى فنجان هاتخرج منها بوضع اقوى من الاول وخسائر تساوى صفر ،

 بالمناسبه , بريطانيا لم تحكم العالم بجيشها , انما بالمكر السياسى , لو على جيشها كان زمانه انسحق على سواحل مصر 1882،المكر السياسى هو اللى صنع الامبراطوريات وليست الجيوش القويه , راجعوا السيناريو الرومانى والانجليزى والامريكى ,دايما كانوا العسكريين صف تانى بينما الساسه كانوا فى المقدمه  , الجيوش كانت بتتحرك على خطوط رسمها سياسيين مقدما ,يعنى كنوع من انواع التشطيب لشغل بدأه ساسه  , انما الدول اللى مشت بالعكس , كان السقوط المدوى من نصيبها , مع ان جيوشها كانت اقوى، راجعوا مثلا سيناريو نابليون وسيناريو هتلر , اينعم فلسفتهم التوسعيه داخل اوروبا كان لها دور اساسى فى سقوطهم , لكن تنظيم السلطه عندهم وتقديم القوه العسكريه على القوه السياسيه , كان له دور محورى فى سقوطهم برضه، معداش عليا كتاب بيتكلم بصدق وبعمق كافى عن ثورة 19 ,معلوماتى مستقاه من جمل متناثره اتذكرت بشكل عابر فى كتب مكانش موضوعها الاساسى ثورة 19 اصلا،مشكلتنا كمصريين اننا لما بنتعامل مع شخصيه سياسيه عندها غباء كارثى , من كتر عجزنا عن تفسير غباءها بنتحول لاننا نقيمه انه دهاء سياسى، كمنوذجين مثاليين :  انور السادات - السيسى ..

الرحمة

يقول الله الرحمن الرحيم مخاطباً من وصفه بالرؤوف الرحيم (وماارسلناك الا رحمة )

الا رحمة

الا رحمة 

حصر وقصر 

يعني دعوتك تبقى رحمة ، أمرك بالمعروف رحمة ، نهيك عن المنكر رحمة ، جوازك رحمة ، طلاقك رحمة ، تربيتك لأطفالك رحمة ، تصادق رحمة ، تترك اصدقاءك رحمة ، تمشي رحمة ، تقعد رحمة ،  تروح رحمة ، تيجي رحمة .

 الرحمة تصاحبك في جميع حياتك ، وتفاصيلها كما الاخلاص تماماً ، الرحمة والإخلاص 

أي أمر  رحمة 

أليس  الرسول صلى الله عليه وسلم قدوتنا ؟

 لم يرسل إلا رحمة ، بشيرا ونذيرا رحمة .

تاملات في سورة الانعام ( دعوة نبي الله ابراهيم قومه)

في سورة الأنعام ، كيف دعا سيدنا نبي الله ابراهيم قومه ، لقد مثل أمامهم رحلة البحث عن الحق بكل رفق ودعاهم بكل حب ، النجم ، ثم القمر ، ثم الشمس 

 ويتدرج معهم عليه  السلام ليصف لهم أن ماهم فيه هو شرك

..لا أحب الآفليين

..لأن لم يهدني ربي لأكونن من القوم الضالين

..ياقوم إني بريء مما تشركون .

كان أمة عليه  أفضل الصلاة والسلام ، حتى في غير هذا الموضع دعوته لأبيه أو عمه ، لقومه.. فيها براعة ورحمة وتفنن ، ويقال أن معنى اسمه عليه السلام  ( أبٌ رحيم)

فهل ندعو نحن "غير المشركين" بكل هذا اللطف والرقي ؟

أم أننا ندفع بهم دفعاً إلى سبيل الغي وطريق العناد!

اللهم علمنا خلق نبيك إبراهيم في الدعوة

نحن ننسى أننا ندعو خلق الله إلى الله.. لأننا مشفقون عليهم أن يحرموا لذة الطاعة ، مشفقون عليهم من عذاب الله ، فكيف يكون حال المشفق  الرحيم مع من يرحمه .

عزلة

حالة من الملل تتملكني بين الوقت والآخر  فأجدني أحب أن ابتعد عن أغلب البشر.. لا أريد أن أسمع أصواتهم.. ولا أريد فهم ما يقولن.. أشعر أن الكثيرون يمتهنون التمثيل.. وليته كان تمثيلا محترفاً.. بل أسوء أنواع التمثيل .   
حين يحدث هذا أجد نفسي أتجه الى أحد الكتب المحببة إليّ.. أو إلى المذياع.. المذياع ليس صوت بشري.. إنه السفر عبر الزمان..

 وللمذياع معي ذكريات لا أنساها.. أظن أنني اقتنيت جميع أحجام المذياع..  وجميع ألوانه.. كانت حقيبتي لا يفارقها  "راديو ترانزستور"  كان سلوتي منذ كنت في الصف الأول الإعدادي.. كان المذياع يريني وطني ( مصر ) ذلك الحبيب الغائب.. اذ كنت أعيش مع أسرتي خارج مصر . 

كنت أقلب محطات المذياع.. فاحط رحالي تارة على قطوف دانية.. وكان على اذاعة القران الكريم.. وتارة اسمع صوت رنات ساعة جامعة القاهرة على البرنامج العام قبل النشرة الإخبارية.. أو يأتيني صوت الراحل عمار الشريعي وهو يصطحبنا في رحلة في"غواص في بحر النغم"

 
وأظل أقلب يميناً ويساراً حتى يحين موعد ( قاااال الفيلسوف) وغالباً لا أسمع إلا سؤال المذيعة لصديقها الفيلسوف.. ثم يغلبني النوم لأنتبه وقد انتهى البرنامج ولم أسمع إجابة الفيلسوف! 

كان ولا زال بيني وبين الثرثرة بلا هدف جفاء.. فلا أطيقها ولا أظنها تطيقيني ، ولا اظن ان احدً مثلي يحب المذياع  يطيق الثرثرة.. 

نحن نحب أن نسمع لكننا نختار مانسمع..
حين يبدأ أحدهم الثرثرة "الفارغة" أشعر بكم الفراغ الذي ينطوي بداخله !!